অসমৰ কুটীৰ শিল্প অসমীয়া ৰচনা
Asomor kutir khilpa assamese essay
AssamQna
আৰম্ভণি : হাতে গঢ়া সাধাৰণ সা - সঁজুলিৰ সহায়ত নিজ ঘৰৰ পৰিসৰৰ ভিতৰত থলুৱা কেঁচা সমগ্ৰীৰে যিবোৰ উদ্যোগ গঢ়ি উঠে সেইবোৰ উদ্যোগকে ‘ কুটিৰ উদ্যোগ ’ বা ‘ কুটিৰ শিল্প বুলি কোৱা হয় ।
প্রাচীন কালৰ পৰাই ভাৰত কুটিৰ শিল্পত চহকী । ভাৰতৰ উত্তৰ - পূৰ্বাঞ্চলৰ ৰাজ্য অসমো কুটিৰ শিল্পত আগবঢ়া । আনকি কেইবাটাও ক্ষেত্ৰত ই অন্যান্য ৰাজ্যৰ তুলনাত অধিক চহকী । অসমত থকা কুটিৰ শিল্পসমূহৰ ভিতৰত বয়ন শিল্প , বাহঁ - বেতৰ শিল্প , ভাস্কর্য শিল্প , মৃৎ শিল্প , হাতীদাঁতৰ শিল্প , কাঁহ - পিতলৰ শিল্প , কাঠ শিল্প আদিয়েই প্রধান ।
বয়ন শিল্প : বয়ন শিল্পত বিশ্বৰ ভিতৰতে অসমৰ এক সুকীয়া আসন আছে । অসমৰ জীয়ৰী - বোৱাৰী সকলোৱে বয়ন শিল্পত পাকৈত । অসমৰ ছোৱালীয়ে কাপোৰ ব'ব নজনাটো এসময়ত বৰ লাজৰ কথা বুলি বিবেচনা কৰা হৈছিল । অসমৰ পাট , মুগা , এৰি আদি কাপোৰ অকল ভাৰততেই নহয় সমগ্র বিশ্বতে সমাদৰ লাভ কৰিবলৈ সক্ষম হৈছে । অসমীয়া তিৰোতই তৈয়াৰ কৰা পাট - মুগাৰ কাপোৰে এসময়ত মোগল হেৰেমসমূহত আলোড়নৰ সৃষ্টি কৰিছিল । প্ৰভু কৃষ্ণৰ নাতিয়েক অনিৰুদ্ধ কোঁৱৰে অসমীয়া সাজ পৰিধান কৰা উষাদেৱীক চাই মুগ্ধ হৈছিল । মহাপুৰুষ শংকৰদেৱেৰ তত্বাৱধানত তৈয়াৰ কৰা বৃন্দাবনী বস্ত্ৰখনৰ কথা আজি বিশ্বৰ সকলোৱে জানে । অসমৰ শিপিনীয়ে তৈয়াৰ কৰা ফুলাম কাপোৰ দেখি জাতিৰ পিতা মহাত্মা গান্ধীয়ে মন্তব্য কৰি কৈছিল , ' অসমীয়া তিৰোতাই কাপোৰত সপোন ৰচিব পাৰে ।
বাঁহ- শিল্প : অসমৰ থলুৱা কুটিৰ শিল্পসমূহৰ ভিতৰত বাঁহ - বেতৰ শিল্প উল্লেখযোগ্য । অসমীয়াসকলে নিজ ঘৰতে বাঁহ আৰু বেতেৰে ঢাৰি , খালৈ , জাকৈ , ঢলা , কুলা , পাচি , ফুলদানি , পিকদানি , ছাইদানি আদি বহুতো সুন্দৰ সুন্দৰ বস্তু তৈয়াৰ কৰে । বৰ্তমান অসমৰ বাহিৰলৈয়ো এইবোৰ ৰপ্তানি হৈ আছে ।
মৃৎশিল্প : মৃৎশিল্প বুলিলে বোকা মাটিৰে তৈয়াৰ কৰা সা - সামগ্ৰীক বুজায় । এসময়ত মৃৎশিল্পত অসম চহকী আছিল অসমীয়া কুমাৰ সম্প্ৰদায়ৰ লোকসকল এই শিল্পৰ লগত জড়িত । সিহঁতে বোকা মাটিৰে বিভিন্ন ধৰণৰ পাত্ৰ , যেনে : কলহ , ভুৰুকা , কেটেলি , কেৰাহী , ঢেকচি , খুলা , পাতিল , খুৰা , গছা , ছামনি , ঘটি আদি বস্তু তৈয়াৰ কৰাৰ উপৰিও সৰু সৰু ল'ৰা - ছোৱালীৰ বাবে নানান ধৰণৰ খেলনা যেনে : ঘোঁৰা , হাতী , পুতলা , ফুলৰ আৰ্হি আদি তৈয়াৰ কৰে ।
কাঁহ - পিতলৰ শিল্প : অসম কাঁহ - পিতলৰ শিল্পত ভাৰত বিখ্যাত । অসমৰ হাজো আৰু সৰ্থেবাৰী কাঁহ - পিতলৰ বস্তু কৰাত অগ্ৰগণ্য । এসময়ত অসমৰ কাঁহ - পিতলৰ সামগ্ৰী ভাৰতৰ অন্যান্য প্ৰদেশলৈ ৰপ্তানি কৰা হৈছিল । মধ্য যুগত অসমৰ কাঁহ পিতলৰ সামগ্ৰী মোগল দৰবাৰলৈ পঠোৱা হৈছিল বুলি ইতিহাসত প্ৰমাণ পোৱা যায় ।
হাতীদাঁতৰ শিল্প : অসমৰ এক আপুৰুগীয়া আৰু গৌৰৱময় শিল্প হৈছে হাতীদাঁতৰ শিল্প । অসমৰ শিল্পীয়ে হাতী দাঁতেৰে নানান কাৰুকার্য খচিত অলংকাৰ তৈয়াৰ কৰাৰ উপৰিও বুঢ়া মানুহৰ কাৰণে হাতৰ লাখুটি তৈয়াৰ কৰে । অসমৰ বৰেপটা হাতীদাঁতৰ শিল্পত ।
কাঠ - শিল্পঃ অসমৰ আন এবিধ কুটিৰ শিল্প হৈছে কাঠৰ শিল্প । অসমীয়া শিল্পীসকলে কাঠেৰে বিভিন্ন ধৰণৰ আচবাব তৈয়াৰ কৰাৰ লগতে বেদীৰ সিংহাসন , কৃষ্ণমূৰ্তি , মুখা , দেৱ - দেৱীৰ মূৰ্তি আদি তৈয়াৰ কৰাত সিদ্ধহস্ত ।
এসময়ত অসম কুটিৰ শিল্পত চহকী আছিল যদিও বর্তমান এই শিল্প বহুত প্ৰত্যাহ্বানৰ সন্মুখীন হৈছে । ইয়াৰ ঘাই কৰাণ হৈছে আধুনিক বিজ্ঞানৰ আৱিষ্কৃত বৃহৎ যন্ত্ৰ - পাতিৰ সহায়ত তৈয়াৰ কৰা বস্তু - সামগ্ৰীৰ প্ৰতিযোগিতাৰ লগত ই তিষ্টিব পৰা নাই । বৃহৎ কল - কাৰখানাত উৎপাদিত বস্তুৰ তুলনাত হাতেৰে সাধাৰণ সা - সঁজুলিৰে তৈয়াৰ কৰা বস্তুৰ খৰচ বেছি হয় । ফলত কুটিৰ উদ্যোগজাত বস্তুৰ চাহিদা কমি গৈছে ।
সামৰণি : কুটিৰ শিল্প অসমৰ এক আচুতীয়া শিল্প যদিও এই শিল্পক জীয়াই ৰাখিবলৈ হ'লে চৰকাৰী পৃষ্ঠপোষকতাৰ প্ৰয়োজন । চৰকাৰ আগবাঢ়ি আহিলে আৰু এই শিল্পৰ বিশেষত্বৰ বিষয়ে অসমীয়া লোকসকল সচেতন হ'লে নিশ্চয় এই শিল্প ঠণ ধৰি উঠিব আৰু পুনৰ বিশ্ব দৰবৰত অসমৰ কুটিৰ শিল্পৰ যশ - কীৰ্তি প্ৰতিষ্ঠিত হয়।