তোমাৰ জীৱনৰ লক্ষ্য অসমীয়া ৰচনা
AssamQna
Tomar jibonor lakhya assamese essay
Essay in assamese
আৰম্ভণি : কোনো এক নির্দিষ্ট স্থানত উপনীত হোৱা সংগ্ৰামৰ নামেই হৈছে লক্ষ্য । প্ৰত্যেকজন মানুহৰ জীৱনত এক লক্ষ্য থকা উচিত । লক্ষ্য নোহোৱা মানুহ গুৰিয়াল নোহোৱা নাওঁৰ দৰে । কিন্তু ব্যক্তি এজনে তেওঁৰ দক্ষতা অভিৰুচি অনুসৰি লক্ষ্য নিৰ্ধাৰণ কৰা উচিত ।
জীৱনৰ লক্ষ্য : আন বহুতৰ দৰে ময়ো মোৰ অভিৰুচি অনুসৰি জীৱনৰ এক লক্ষ্য বুকুত বান্ধি লৈছোঁ । মোৰ জীৱনৰ লক্ষ্য হৈছে এজন শিক্ষক হোৱা । ছাত্র জীৱনেই হৈছে লক্ষ্য স্থিৰ কৰা সঠিক সময় । সেয়ে মই মোৰ জীৱনৰ লক্ষ্য স্থিৰ কৰি তাত উপনীত হ'বলৈ যত্ন কৰি আছোঁ ।
লক্ষ্য বাছি লোৱাৰ কাৰণ / লক্ষ্য নিৰ্ধাৰণৰ কাৰণ : এখন সুস্থ সমাজ গঠনৰ ক্ষেত্ৰত এজন আদর্শ শিক্ষকৰ ভূমিকা অতি গুৰুত্বপূৰ্ণ । সেয়ে মোই এজন প্রকৃত শিক্ষক হ'ব বিচাৰোঁ । শিক্ষক এজন হৈছে সকলোৰে ভাল বন্ধু , দার্শনিক আৰু পথ - প্ৰদৰ্শক যিয়ে তেওঁৰ উচ্চ নৈতিক , সৎ আৰু আদৰ্শ জীৱন শৈলীৰ জৰিয়তে অকল ছাত্র - ছাত্রীসকলোকে নহয় , তেওঁৰ সংস্পৰ্শলৈ অহা সকলো মানুহক সুশিক্ষা দিয়ে । শিক্ষকে নিজৰ জ্ঞানৰ পোহৰেৰে এখন অন্ধকাৰ সমাজ পোহৰাই তুলিব পাৰে । শিক্ষকে নিজৰ দক্ষতাৰে এজন ছাত্রক ডাক্তৰ , ইঞ্জিনিয়াৰ , উকীল অথবা এজন সুনাগৰিক হ'বলৈ প্ৰস্তুত কৰি তোলে । সকলোকে মানৱীয় গুণৰ শিক্ষা দিয়া শিক্ষক পদটো মই মোৰ জীৱনৰ লক্ষ্য হিচাপে নির্বাচন কৰাৰ কাৰণ অনেক । শিক্ষকৰ সুআদর্শ তথা আন আন কাৰণে মোক শিক্ষক হ'বলৈ অনুপ্ৰেৰণা যোগাইছে ।
লক্ষ্যত উপনীত হোৱাৰ উপায় : জীৱনৰ লক্ষ্যত উপনীত হ’বলৈ আত্মবিশ্বাসৰ লগতে চেষ্টাৰ প্ৰয়োজন । মই মোৰ লক্ষ্যত উপনীত হোৱাৰ উদ্দেশ্যে বিভিন্ন প্ৰকাৰে প্ৰস্তুতি চলাই আছোঁ । মই যিহেতু এতিয়া এজন শিক্ষার্থী গতিকে বর্তমান মই এজন ভাল ছাত্র হোৱাৰ চেষ্টা কৰি আছোঁ । আজৰি সময়ত ভাল ভাল কিতাপ পঢ়াৰ অভ্যাস কৰি আছোঁ যাতে সকলো আকাৰৰ জ্ঞান আয়ত্ব কৰিব পাৰোঁ । ভবিষ্যতেও উচ্চ শিক্ষা গ্ৰহণ কৰিবলৈ স্থিৰ কৰিছোঁ আশা কৰিছো যে এই প্রস্তুতিসমূহে মোক এজন প্রকৃত শিক্ষক হোৱাত সহায় কৰিব |
সামৰণি : লক্ষ্য সাধনৰ বাবে প্ৰয়োজন অধ্যাৱসাৰ । ' যত্ন কৰিলে ৰত্ন পায় ' কথাষাৰ মনত পুতি লৈ লক্ষ্যত উপনীত হোৱাৰ উদ্দেশ্যে একাগ্র চিত্তে শিক্ষা সাধনত ব্ৰতী হৈ আছোঁ । মোৰ দৃঢ় বিশ্বাস যে মই এদিন মোৰ লক্ষ্যত উপনীত হৈ নিজক প্রতিষ্ঠিত কৰাৰ লগতে মোৰ সমাজ তথা দেশখনক উপকৃত কৰিব পাৰিম ।